Vissir þú ...

Lög DIFN finnast hér á prenthæfu formi.

Nafn og heimili

§ 1
Félagið heitir "Dansk-Íslenska Félagið á Norður-Jótlandi", skammstafað DIFN, og heimilisfang þess
er Álaborg.

Markmið félagsins

§ 2
Markmið DIFN er:
• Að mynda sameiginlegan félagsskap Íslendinga og Dana á Norður-Jótlandi sem áhuga hafa á
íslenskum málefnum.
• Að stuðla að góðu félagslegu samstarfi og styrkja starf sem vinnur að sameiginlegum málefnum
félagsmanna.
• Að gæta hagsmuna félagsmanna.
• Að vinna sjálfstætt eða í samvinnu við önnur Íslendingafélög að því að skapa og efla vináttubönd
Íslands og Danmerkur.

Félagar

§ 3
Sérhver sá sem áhuga hefur á málefnum félagsins getur gerst meðlimur þess.

§ 4
Stjórn félagsins velur og tilkynnir heiðursfélaga félagsins. Einnig er hægt að nota aðalfund félagsins
til að ákveða heiðursfélaga eftir tillögum stjórnar. Heiðursfélagar skulu heiðraðir á Þorrablóti
félagsins.

§ 5
Æðsta vald í málefnum félagsins hefur aðalfundur.
Starfsemi félagsins stýrir stjórnin undir forystu formanns.
Innan vébanda félagsins starfa fastanefndir sem kveðið er á í lögum þess.
Félagið getur gerst aðili að öðrum samtökum.

Aðalfundur

§ 6
Aðalfundur skal haldinn á fyrsta ársfjórðungi. Hann skal boðaður félagsmönnum skriflega með
minnst átta daga fyrirvara.
Dagskrá aðalfundar skal vera sem hér segir:
1. Skipun fundarstjóra og fundarritara.
2. Skýrsla formanns.
3. Skýrslur fulltrúa DIFN í öðrum samtökum.
4. Gjaldkeri leggur fram endurskoðaða reikninga félagsins.
5. Inntaka nýrra félaga.
6. Félagsgjald ákveðið.
7. Tillögur: Tillögur eiga að berast formanni minnst þremur dögum fyrir aðalfund.
8. Kosning stjórnarmanna, fastanefndarfulltrúa, endurskoðanda og fulltrúa félagsins í öðrum
samtökum.
9. Önnur mál.

§ 7
Aukaaðalfund skal halda ef stjórn félagsins óskar þess eða ef þriðjungur eða 25 félagsmenn bera
fram skriflega ósk um það við stjórnina. Aukaaðalfundur skal boðaður með sama hætti og
aðalfundur, sbr. § 6.

§ 8
Kosningarétt á aðalfundi hafa allir félagsmenn sem eru sextán ára og eldri og hafa greitt félagsgjöld til félagsins, þar á meðal þeir sem ganga í félagið og greiða félagsgjald sitt á aðalfundi.

§ 9
Afl atkvæða ræður úrslitum. Til breytinga á lögum félagsins þarf þó 2/3 atkvæða þeirra félaga sem
sækja fundinn, sbr. § 29.

Félagsstjórn

§ 10
Stjórn félagsins er kjörin á aðalfundi og skipa hana minnst 5 og mest 9 aðalmenn, nánar tiltekið:
formaður, varaformaður, ritari, gjaldkeri og meðstjórnendur.
Stjórnin skal kjósa formann úr sínum hópi og skipta með sér verkum á fyrsta stjórnarfundi eftir
stjórnarkjör.
Gjaldkeri er sjálfskipaður fulltrúi í skemmtinefnd og skal hann annast fjármál nefndarinnar.
Kjörtímabil stjórnar er eitt ár.

§ 11
Á stjórnarfundum ræður afl atkvæða. Verði atkvæði jöfn skal atkvæði formanns ráða úrslitum.

§ 12
Forfallist formaður eða segi af sér tekur varaformaður sæti hans.
Formenn fastanefnda félagsins skulu jafnframt vera varamenn stjórnar.

Heimild félagsstjórnar

§ 13
Stjórn félagsins hefur heimild til að taka lán fyrir hönd félagsins sem félagsmenn sameiginlega eru
ábyrgir fyrir. Heildarlán félagins með ábyrgð félagsmanna má aldrei vera hærra en DKK 50.000.

§ 14
Formaður og gjaldkeri félagsins hafa einir prókúru fyrir hönd félagsins og hafa einnig umboð til að
skrifa undir samninga fyrir hönd félagsins.

§ 15
Stjórn félagsins skal leitast við að byggja upp sem stærstan aðalsjóð (höfuðstól), sem nota á við
sérstök tilefni eins og t.d. varðandi húsnæðismál félagsins, stórhátíðir félagsins (stórafmæli) o.fl.
Með þessu er ekki átt við að félagið eigi að byggja upp höfuðstól á peningum félaga sinna, heldur
er átt við styrki sem félagið fær frá Aalborg Kommune og öðrum aðilum.
Það er ekki markmið félagsins að reka tekjulausa starfsemi ár hvert.

Félagsgjöld

§ 16
Félagsmenn skulu greiða ársgjald til félagsins. Upphæð félagsgjalds skal ákveðin á aðalfundi að
fengnum tillögum stjórnar.
Félagsaðild gildir í eitt ár frá greiðsludegi.

§ 17
Félagsmaður sem ekki endurnýjar félagsaðild sína missir sjálfkrafa félagsréttindi sín. Félagsmaður
öðlast réttindi sín á ný ef hann greiðir félagsgjöld.

§ 18
Heiðursfélagar greiða ekki ársgjald.

§ 19
Hægt er að gerast ævifélagi með því að greiða ævifélagsgjald sem stjórnin ákveður hverju sinni.

Reikningar og endurskoðun

§ 20
Reikningsár félagsins miðast við aðalfundi. Stjórn setur á hverjum tíma reglur um bókhald.
Reikningar félagsins skulu vera endurskoðaðir af einum endurskoðanda kjörnum af aðalfundi. Afrit
af reikningum félagsins skulu liggja frammi á aðalfundi og skulu þeir bornir fram til samþykktar á
fundinum.

§ 21
Allir sjóðir félagsins, að meðtöldum sjóðum fastanefnda sem starfa innan félagsins skulu vera í
vörslu stjórnar.

§ 22
Af þeim tekjum sem koma inn til félagsins vegna auglýsinga má ráðstafa 20% til þess aðila sem
aflar auglýsingarinnar og öðrum 20% til þess aðila sem vinnur að uppbyggingu heimasíðu félagsins.

Fastanefndir

§ 23
Á aðalfundi skal kjörinn minnst einn fulltrúi í ritnefnd Mímis. Starfssvið ritnefndar er að annast
útgáfu eins eintaks af Mími á starfsárinu ásamt Sími sem gefin skal út á fyrsta ársfjórðungi. Einnig
skal ritnefndin annast uppfærslu heimasíðu félagsins, www.difn.dk. Þar að auki skal nefndin sjá
um uppfærslu annarra heimasíðna félagsins eins og t.d. www.fifa.difn.dk og www.mimir.difn.dk.
Ritnefndin skal einnig aðstoða fastanefndir innan félagsins við að koma upp heimasíðu undir léni
D.I.F.N.

§ 24
Á aðalfundi skal kjörinn minnst einn fulltrúi í skemmtinefnd DIFN. Starfssvið skemmtinefndar er að
annast skipulagningu og framkvæmd skemmtanna félagsins í samvinnu með stjórn félagsins.
Skemmtinefnd sér einnig um skipulagningu þorrablóts félagsins.

§ 25
Á aðalfundi skal kjörinn minnst einn fulltrúi í æskulýðsráð DIFN. Starfssvið æskulýðsráðs er að hafa
yfirumsjón með íþróttastarfssemi, barnastarfi, kirkjuskóla og annari starfsemi er falla undir verksvið æskulýðsráðs.

§ 26
Um allar fastanefndir félagsins gildir að kjörnir og tilnefndir nefndarfulltrúar hafa frjálsar hendur
með að velja sér samstarfsaðila.

§ 27
Fastanefndir félagsins skulu fara að fyrirmælum stjórnar varðandi meðferð fjármuna og
bókhaldsreglur sbr. § 18.

§ 28
Leikfélagið Ultima Thule er hluti af félagsstafsemi D.I.F.N. D.I.F.N. er fjárhagslega ábyrgt hvað
varðar rekstur leikfélagsins og skal gjaldkeri D.I.F.N. vera gjaldkeri leikfélagsins og sitja í stjórn
þess.
D.I.F.N. skuldbindur sig til að fjármagna starfsemi leikfélagsins fyrirfram með því skilyrði að
vilyrði fyrir styrkjum séu fyrir hendi. Stjórn D.I.F.N. skal samþykkja fjárhagsáætlun leikfélagsins,
en kemur að öðru leyti ekki að rekstri leikfélagsins.
D.I.F.N. skal úthluta úr sjóði leikfélagsins hverju sinni og sé hagnaður á rekstri leikfélagsins, má
nota hluta af þessu fjármagni til eflingar menningarlífs í D.I.F.N.Um rekstur leikfélagsins er vísað
til laga leikfélagsins Ultima Thule og skal stjórn D.I.F.N. hafa afrit af lögum leikfélagsins hverju
sinni.

Aðild að samtökum

§ 29
Félagið getur gerst aðili að öðrum samtökum. Tillaga um aðild skal hljóta sömu málsmeðferð og
lagabreytingar. Fulltrúar DIFN í samtökum sem félagið er aðili að skulu kosnir á aðalfundi.

Brottvikning

§ 30
Brottrekstur úr félaginu skal borinn undir almennan félagsfund og hafi þá komið fram tillaga þar að
lútandi frá eigi færri en þriðjungi félagsmanna. Tillagan er því aðeins samþykkt að meirihluti
fundarmanna greiði henni atkvæði.

Lagabreytingar

§ 31
Breytingar á lögum þessum má eingöngu gera á aðalfundi eða aukaaðalfundi.
Tillögur um lagabreytingar, sem leggja á fyrir aðalfund, skulu berast formanni skriflega þremur
dögum fyrir aðalfund, sbr. § 6.
Til lagabreytinga þarf 2/3 greiddra atkvæða.
Lagabreytingar skulu birtar félagsmönnum.

Félagslíf

§ 32
Ákvörðun um að leysa upp félagið er aðeins hægt að taka á aðalfundi, þar sem a.m.k. 2/3
atkvæðisbærra félagsmanna eru mættir og þarf til 2/3 atkvæði fundarmanna. Ef aðalfundur, sem
sóttur er af færri en 2/3 atkvæðisbærra félagsmanna, samþykkir að leysa upp félagið með 2/3
atkvæða, skal boðað til nýs aðalfundar. Þar er hægt að taka þá ákvörðun að leysa upp félagið, ef
2/3 fundarmanna samþykkja það.

§ 33
Ef félagið verður leyst upp skal afhenda ræðismanni Íslands á Norður Jótlandi allar eigur þess til
varðveislu.

Gildistökuákvæði

§ 34
Lög þessi öðlast gildi við lok þess aðalfundar sem samþykkir þau í samræmi við fyrirmæli áður
gildandi laga.